“Treinamentu ne’e ho intensaun atu fahe konesementu kona ba prevensaun HIV/SIDA ba Polisia Nasional sira atu sira bele habelar tan informasaun sira ne’e ba sira nia kolega iha servisu fatin tanba moras HIV/SIDA ne’e hadaet liu husi relasaun seksual e iha momentu ida ne’e importante tebes fo hanoin ba PNTL sira bainhira hala’o atividade hanesan seguransa ba nasaun ida ne’e nian, sira bele hado’ok an rasik husi moras ida ne’e,” dehan Coordenador Nasional Programa HIV/SIDA iha UNFPA, Paulino Pinto, iha Salaun Cannosa Becora, Dili.
Nia hatutan, informasaun importante seluk ne’ebe PNTL sira hatene mak kona ba Esploitasaun Abuzu Seksual, nune’e sira hatene rezolve bainhira mosu no akontese iha komunidade sira nia le’et.
Treinamentu durante loron hitu ne’e partisipa husi membru PNTL selesionadu husi Unidade ida-idak husi 13 distritus.
“Ami mos iha copia materia kona ba topiku ne’ebe iha atu membru polisia sira bele lori no fahe ba membru polisia sira seluk ne’ebe la hetan oportunidade atu tuir treinamentu ne’e,” dehan tan Coordenador Pinto.
Entretantu Xefe Sentru Formasaun Akademia Polisia (AKPOL), Superintendente Carlos Jeronimo agradese ba oportunidade ne’ebe UNFPA fo ba membru PNTL sira atu hatene klean liu tan kona ba moras HIV/SIDA no seluk tan tanba informasaun importante tebes ba ema ida-idak.
“Ita hanorin sira liu husi treinamentu sira hanesan ne’e, nune’e sira bele sente katak moras ida ne’e la diak no hakbesik an ba sira nia kolega sira atu fo hanoin ba sira katak moras ne’e la diak no bele iha konsiensia hodi prevene an husi moras ida ne’e,” dehan Xefe AKPOL ne’e.
Tuir nia, formasaun la’os deit liu husi treinamentu hanesan ne’e maibe mos komandante ida-idak atu fo hanoin ba nia membru sira bazeia ba notisias sira ne’ebe fo sai, liu husi enkontru inklui mos formatura lor-loron atu membru sira bele iha konesementu kona ba moras sira ne’e.
