“Ita ne’e estadu de direitu demokratiku, ne’e duni ita hotu-hotu hanesan iha lei nia oin, maibe iha deferensia oituan bainhira ba Polisia Nasional Timor- Leste maka involve problema hanesan ne’e, sira sei hasoru buat rua, ida nia sei hasoru prosesu disiplinar ne’ebe regula ona iha instituisaun PNTL nia laran no ida seluk tan mak nia tenke prosesa tuir lei ne’ebe vigora iha nasaun ne’e,” dehan Xefe.
Sentru Formasaun Akademia Polisia (AKPOL) Superintendente Carlos Jeronimo, iha Cannosa Becora, Dili.
Maske durante ne’e seidauk iha membru Polisia Nasional Timor-Leste ne’ebe halo asaun ou involve iha Esploitasaun Abuzu Seksual ne’e, maibe kuandu iha sei hetan kastigu dobel.
“Hau ladun hatene ho klaru so iha investigasaun maka hatene liu, maibe tuir hau nia konesementu durante ne’e seidauk iha membru ida maka halo asaun ne’e,” dehan Xefe AKPOL ne’e.
Iha lidun seluk Deputadu Loenel Marsal espera katak, membru PNTL sira labele involve iha kazu hanesan ne’e.
“Tanba polisia maka kaer lei no orden, wainhira sira maka involve fali iha kazu hanesan ne’e ita atu dehan hanusa tan, ne’e duni husu ba Polisia sira tenke tau an nudar ema ne’ebe maka kaer lei no orden,”Deputadu Marsal esperansa.
Tanba ne’e husu ba Polisia sira tenke kumpri duni lei ne’ebe iha, atu nune’e povu bele tau konfiansa no bele kolabora ho Polisia bainhira aplika lei.
