“Ita seidauk iha lei ne’ebe mak hatete atu taka fatin prostituisaun sira ne’e, tanba ne’e ita atu atua susar oituan, maibe ba oin Governu liu husi Sekretariu Estadu Politika Profesional no Empregu sei halo koperasaun masimu ho Ministerio Negosio Estrangeiru, Ministerio Komersio Industria e Meiu Ambiente, Ministerio Defeza no Seguransa liu-liu Polisia Imigrasaun atu halo kontrola ba sira nia pozisaun, tanba prostituisaun la’os servisu profesional ida maibe servisu ne’ebe afeta ba ema nia dignidade entaun tenke kontrola no kombate iha nasaun joven ida ne’e,” dehan Reprezentante SEPFOPE, Aniceto Leto Soro, iha Hotel Vila Verde, Dili.
Timor-Leste nudar nasaun joven ne’ebe presiza tebes rekursu umanu tanba ne’e atividade prostituisaun ne’e tenke tau iha fatin ida ne’ebe kontroladu.
Iha parte seluk Diretora Nasional Saúde Komunidade, Isabel Maria Gomes hateten asuntu prostituisaun sai preokupasaun bo’ot ida ne’ebe Timor-Leste hasoru maibe Ministeriu Saúde hamutuk ho parseiru sira nafatin halo promosaun ba prevensaun HIV/SIDA tama sai fatin prostituisaun sira iha rai laran no seluk tan.
“Hau hanoin ba fatin prostituisaun sira ne’e problema agora seidauk iha fatin ida ne’ebe lokalizado maibe tantu fatin prostituisaun no Hotel sira husi parte ministerio saúde servisu hamutuk ho Komisaun Nasional Luta Hasoru HIV/SIDA halo mos promosaun, edukasaun saúde atu eleva sira nia kuinesementu ba prevensaun HIV/SIDA ba sira nia an rasik no sira nia kliente,” dehan Diretora Gomes.
