“Ami koalia mos iha fatin barak liu–liu oinsa atu servisu hamutuk ho ministeriu edukasaun atu hadia merenda eskolar, ami hanoin iha planu atu fo hanoin ba malu uza grupu feto sira ne’ebe iha ona kapasidade atu sira mak fornese hahan ba iha eskola sira,” hateten Sekretaria Estadu Idelta Maria Rodrigues, iha Sentru Konvensaun, Dili.
Maske ideias ida ne’e hanesan planu ba longu prazu nian maibe SEPI fiar no iha espetativa bo’ot tebes atu prepara grupu feto sira iha area rurais hodi responde ba planu sira ne’e iha futuru.
Relasiona ho ne’e SEPI asina ona akordu ho Ministra impoderamentu ba feto no Protesaun Labarik Indonezia nian foin lalais iha Indonezia hodi fo kapasitasaun ba grupu feto sira.
Tuir nia, planu atu hakbi’it no promove produsaun grupu feto sira nian bele fo vantagen mos ba governu hanesan minimize exportasaun sasan husi liur.”Maibe planu ida ne’e la’os implementa iha eskola hotu, iha eskola balun deit hodi hare nia rezultadu,” tenik SE Rodrigues ne’e.
Iha parte seluk Reprezentante Feto iha Parlamentu Nasional, Deputada Albina Marçal Freitas konkorda ho planu ida ne’e, nune’e bele utiliza produtu iha rai laran nia rasik.
“Hau konkorda tebes tanba uluk hau seidauk sai nudar reprezentante povu hau sempre foti kestaun ida ne’e ba ministeriu edukasaun bainhira vizita ba distritu, hau sempre hato’o katak kona ba merenda eskolar nusa mak ita la halo kordenasaun ida diak ho grupu feto sira ne’ebe iha produtu hodi fornese aihan ba eskola sira ne’ebe besik, tanba menu ne’ebe Ministeriu edukasaun iha hanesan mos ho produtu ne’ebe grupu feto sira iha,” dehan Deputada Freitas.
Tanba ne’e nia sujere ba ME atu bele kria politika ida diak hodi bele responde ba preokupasaun ne’ebe komunidade sira kona ba ME no harii mos komisaun ida hodi rekolha aihan husi grupu feto sira iha area rurais hodi fornese ba eskola sira ne’ebe besik, nune’e bele hadia kualidade Merenda Eskolar no promove mos produsaun produtu grupu feto sira nian.
