“Buat ida violensia ne’e hau sente agora dadaun nia numeru aumenta maka’as tebes iha ne’ebe deit kompara ho buat seluk entaun membru polisia sira mos tenke prepara sira nia matenek iha futuru atu bele hasoru situasaun sira hanesan ne’e,tanba ne’e mak ohin membru polisia sira involve iha treinamentu hasa’e kapasidade kona ba Violensia Bazeia ba Jeneru (VBJ),” dehan Xefe Sentru Formasaun Akademia Polisia (AKPOL), Carlos Jeronimo, bainhira abertura treinamentu kona ba VBJ (22/10), Prevensaun HIV/SIDA no esploitasaun Abuzu Seksual, iha Salaun Cannosa Becora, Dili.
Nia espera katak, membru PNTL sira ne’e sei la difisil atu reponde ba problema VBJ iha futuru, tanba ne’e aproveita didiak oportunidade tuir formasaun kapasitasaun ida ne’e, aprende no buka hatene informasaun klean kona ba violensia ne’e no vioensia sira seluk.
Entretantu Vise Prezidente Grupu Feto Parlamentar (GMPTL), Deputada Albina Marçal Freitas apoia no agradese ba UNFPA ne’ebe orefese ona formasaun ba membru PNTL sira tanba sira iha knar importante tebes atu fo atendimentu ba kazu violensia hotu inklui mos violensia hasoru feto no labarik.
“Hau hanoin kapasitasaun kona ba violensia bazeia ba jeneru importante tebes espesial liu ba polisia VPU tanba sira mak involve direitamente bainhira akontese violensia hasoru labarik no feto iha rai laran, liu-liu iha area rurais,” Deputada Freitas apoia.
Tuir nia, formasaun ne’e atu haforsa konesementu membru PNTL nian atu iha kordenasaun ho orgaun kompetente hodi fo asistensia ba vitima sira hodi bele atua lalais suspeitu husi krime violensia ne’ebe akontese.
