“Eventu ne’e hanesan advokasia wokshop ida ba setor privadu sira hanesan Hotel, Bar, Diskoteka, atu sira bele iha konesementu klean kona ba HIV/SIDA hodi implementa fali iha servisu fatin, hanesan fo konesementu HIV/SIDA ba sira nia staff rasik no labele halo diskriminasaun se karik iha staff ruma afetadu HIV/SIDA, tratamentu staff tenke hanesan ida ne’e mak kontribuisaun ne’ebe ami espera husi setor privadu sira atu la’o ba oin,” dehan Sekretariu Jeral KNLHS, Rui Carvalho, iha Hotel Vila Verde, Dili.
Iha parte seluk Diretora Nasional Saúde Komunitaria, Isabel Maria Gomes hateten moras HIV/SIDA sai programa prioridade ba Ministeriu Saúde (MS) atu tau atensaun seriu, tanba kada tinan numeru afetadu moras ne’e kontinua aumenta beibeik.
“Maibe governu mesak deit labele halo buat barak, ne’ebe hau hanoin involvimentu husi entidades hotu inklui mos setor privadu,” hateten Diretora ne’e.
Entretantu Reprezentante Sekretariu Estadu Politika Formasaun Profesional no Empregu SEPFOPE) ka atual Diretor Inspesaun Jeral du Trabalhu, Aniceto Leto Soro katak ne’e kolaborasaun servisu ne’ebe diak entre MS ho Setor Privadu, atu fo hanoin ba malu hodi luta kontra moras ne’e buras iha rai laran.
“Hau hanoin setor privadu sira liu-liu empregador sira tenke fo atensaun masimu ba maluk sira ne’ebe afetadu moras ida ne’e, labele halo diskriminasaun ba sira maibe halo tratamentu igual ba sira atu sira mos bele sente valor ne’ebe hanesan ho sira seluk,” Diretor IJT ne’e husu.
