Servisu Investigasaun Kriminal (SIK) oras ne’e dadaun entrega ona kazu joven ho inisial JM (23 anos) ne’ebe hetan sona husi ema diskonesidu iha Bairo-Pite, ba Ministeriu Publiku (MP).
“Foin lalais vitima nia familia mai hato keixa iha ne’e, depois hau kanaliza ba iha Krimi Pesoais depois foti ona nia informasaun konserteza kazu ne’e rejista ona, no tutela ona iha Ministeriu Publiko semana kotuk foin lalais ne’e,” informa Diretor SIK Calizto Gonzaga, iha Kaikoli, Dili.
Kazu ne’e akontese iha 29 Semptember 2011, maisumenus tuku 07:30 kalan e alende ne’e iha mos problema seluk ne’ebe akontese iha Bairo-Pite pertigaan nian.
“Purvolta de 100 metrus hanesan ne’e, iha akontesementu ida mos iha ne’eba, sira hanesan istori malu, e vitima ne’e foin tun husi mikrolet no hetan sona, e hau lahatene vitima ne’e hetan sona husi akontesemente ida ne’ebe, maibe informasuan basiku deit karik nia hetan sona husi ema istori malu ne’e,” dehan Diretor Gonzaga.
Entretantu Deputadu Inacio Moreira hateten, ikus-ikus ne’e akontesementu sona malu komesa buras iha rai laran, ne’e duni husu ba Polisia atu bele toma atensaun.
“PNTL servisu maka’as liu tan, para bele halo prevensaun ba iha krimi sira hanesan ne’e, maibe kazu iha Bairo-Pite ne’e hau ladun hatene krimi ne’ebe maka organizadu ou spontan, ne’e polisia tenke buka hodi hatene,” Deputadu ne’e sujere.
Tuir nia, volume halo patruliamentu tenke aumenta no maka’as liu tan e husu ba atu tribunal fo sansaun judisial ne’ebe forte ba kriminozu sira ne’ebe gosta provoka situasaun.
