“Tribunal ne’e tenke koloka iha distritu hotu-hotu, atu nune’e bele koresponde ho diak, dalaruma kazu barak liu no ho Tribunal ne’ebe maka limitadu no prosesu kleur no halo povu sira hein kleur liu, nune’e bele implementa justisa didiak iha ita nia rai laran, nebe iha distritu balun iha ona no balun seidauk, ” sujere Deputadu Pedro da Costa, iha Parlamentu Nasional.
Deputadu ne’e tenik, MJ bele tau ideas ida ne’e hanesan planu ida atu nune’e bele realize iha futuru tanba kestaun ne’e mos importante.
Hatan ba kestaun ne’e Vise Ministru Justisa (VMJ), Ivo Valente katak, planu ba tinan lima mai ne’e Ministeriu Justisa laiha programa ida hodi hari Tribunal Distrital iha Distritu sira ne’ebe seidauk iha.
“Planu estratejiku dezemvolvementu Nasional ba future ne’e iha, maibe atu hari tribunal iha fatin-fatin ne’e seidauk iha, tanba primeiru ita presiza forma rekursu umanu no presiza forma juises ho numeru ne’ebe maka sufsiente atu responde ita nia prosesu sira no presiza prokurador no defensor sira, ne’e duni la’os fasil presiza buat barak,” dehan VMJ ne’e.
Tuir nia, agora dadaun esforsu ne’ebe maka husi Ministeriu Justisa halo maka oferese Ministeriu Publiku iha Distritu sira.”Hanesan iha Distritu Ermera, Viqueque no Sub-distritu Maliana,” tenik VMJ ne’e.
