Selebrasaun loron Mundial ba Aihan (16/10) ba tinan ne’e, Governu liu husi Ministeriu Agrikultura e Pescas (MAP) lansa kampanha informasaun batar iha Timor-Leste.
“Objective husi kampanha batar ne’e maka, atu enkoraza Timor -oan atu bele mellhora no aumenta konsumu batar, tanba Timor-Leste iha potensia ba produtividade batar ne’ebe a’as,” hateten Treinador Dirasaun Peritu Batar MAP, Claudio Ninas Nabais, iha Sentru Konvensoens Dili, (18/10).
Nia dehan, ho aumenta produsaun batar ne’e bele fa’an, e uma kain sira iha area rural bele aumenta mos sira nia rendimentu, no bele atinji onaobjective RDPT ne’ebe halo ona treinamentu ba treinador estensionista sira atu tulun aumenta produsaun batar iha rai ne’e.
Tuir nia, presiza duni atu dezenvolve produtu local Nasaun Timor-Leste ne’e ba oin, atu nune’e valor nafatin.
“Durante ne’e ita halo melhoramentu ba batar tanba ita haree katak rai Timor mos iha potensialidade ba batar, ne’e duni la’os deit atu importa batar mai husi rai liur maibe ita mos iha kbi’it atu bele kria batar ho variedade oi-oin,” dehan Treinador Nabais.
Kampanha ne’e hala’o liu husi kooperasaun ho parseiru dezenvolvementu MAP nian hanesan Rural Development Programme (RDP), no Uniaun Europeia, Ministeriu Economia Kooperasaun no Dezenvolvementu Governu Federal Alemanhã ne’ebe mos sei halo hamutuk ho Instituto Camoes I.P Deutsche Gesellschaft Fur Internationale Zusammenarbeit.
Enkuantu tuir Deputada Josefa Alvares Soares katak, kampanha husi MAP ne’e diak tebes, hodi fo sai ba Timor-oan tomak kona ba kualidades husi fini batar ne’ebe diak para uza iha rai Timor.
“Agora dadaun ita iha ona kualidade batar hira kedas, batar mutin, batar modok nomos batar ne’ebe maka tama iha kategoria batar kahor ninian ne’e no ida seluk maka batar lotuk no wainhira ita sona ne’e funan-funan, maibe ita iha batar hanesan ne’e hibrida, ita nian iha Timor seidauk iha kuantidade barak, ne’ebe MAP iha dever ida atu promove kualidade sira ne’e,” dehan Deputada Soares.
Deputada ne’e mos sujere ba MAP, atu labele halo kampanha deit maibe hare oinsa para agrikultor sira bele kuda no hetan kualidade ne’ebe diak mos.
