Hafoin tuir formasaun iha Portugal durante fulan walu kona ba investigasaun kriminal nian ho fila hikas mai Timor-Leste iha fulan hirak ba kotuk, agora dadaun Ajenti Investigasaun Kriminal (AIK) 47 hamutuk ho sira nia Formadores halo hela estajiu iha Sentru Formasaun Judisiariu (SFJ) durante fulan neen nia laran.
“Sira nia estudus iha Portugal remata ona e agora sira estajiu hela, pratika iha lapangan hamutuk ho sira nia formadores sira iha Sentru Juridika, sira pratika hamutuk ho PNTL,” hateten Vise Ministru Justisa (VMJ), Ivo Valente, iha Colmera, Dili.
Tuir nia, halo estajiu ne’e importante, nune’e sira bele sai Ajenti ne’ebe diak hodi halo investigasaun ba kriminal sira iha futuru.
“Instituisaun hanesan PNTL dirasaun Investigasaun Kriminal, Komisaun Anti Korupsaun, bele mos hanesan instituisaun sira seluk ne’ebe iha karakter investigativu, hanesan Komisaun Funsaun Publiku,
noProvedoria Direitus Humanus e Justisa, ou institusaun jeral estadu nian bele aproveita sira nia matenek tanba sira iha skill ne’ebe maka bele uza,” sujere VMJ ne’e.
Vise Ministru hatutan, estajiu ne’e ho durasaun fulan neen sei remata iha tinan oin, nune’e sira bele forsa liu tan no kapasitadu liu tan.
Entretantu Deputada Bendita Moniz Magno apoia programa ida ne’e hodi kapasita Ajenti sira ne’e nune’e parte justisa bele hadia diak liu tan iha futuru.
“Sira ba tuir ona estudu durante tempu barak entaun sira presiza pratika, asaun ne’e kapas tebes, tanba ne’e governu maka selu, sira tenke kumpri regras, no bele implementa saida maka sira estuda ne’e ho diak, imparsial no justisa,” Deputada ne’e katak.
Tuir nia, Ajenti ba Justisa ne’e nudar Profesaun ida, ne’e duni tenke sai Professional no hatudu duni indenpendenti.
