Atu enkoraja feto rural sira kontinua hala’o sira nia atividade promosaun ba produtu hanesan homan,suku inklui fila rai hodi diak hodi aumenta sira nia rendementu, Sekretaria Estadu promosaun Igualidade (SEPI) aloka orsamentu $1.000 ba sira iha kada distritus.
“Hau hakarak informa ba ita bo’ot sira katak distritu hotu-hotu sei selebra loron mundial ba feto rural iha distritu laran iha balun sei selebra iha area rural ne’e hau hanoin importante tebes tanba hanesan tema ba tinan ida ne’e “Hakbi’it Feto Rural Hodi Dezenvolve Produtu Local ,” atu oinsa estadu, governu bele hakbi’it feto maluk sira iha area rural hodi hola parte iha prosesu dezenvolvimentu,” hateten SE Idelta Maria Rodrigues, foin lalais iha Dili.
Sekretaria Estadu dehan, tuir sensu uma kain 2010 nian hatudu katak 71% feto iha area rural hala’o servisu informal hanesan homan, suku, fila liman inklui fila rai (agrikultor), e osan ne’e aloka ba sira, atu sira mos bele sente importansia husi loron internasional Feto Rural ne’ebe monu iha dia 15 fulan Outubru ne’ebe governu selebra kada tinan.
Enkuantu ba selebrasaun loron importante ne’e, ba tinan ne’e SEPI aprova orsamentu ho montante $27 mil, kompostu husi 13 Distritus ho montante $13 mil inklui mos selebrasaun nasional ne’ebe hala’o iha Suku Mehara, Sub-distritu Tutuala, Distritu Lautem.
Razaun SEPI hili Suku Mehara, nune’e bele ekoraja feto maluk sira atu dezenvolve sira nia produtu hodi hadia sira nia moris hodi bele hamenus taxa kiak iha area rural no promove igualidade jeneru entre feto no mane, tanba bazeia ba sensus uma kain 2010 71 pursentu feto Timor-Leste hela iha area rural ho ida ne’e presiza tau prioridade ba sira nia nesesidade no importansia hodi garantia partisipasaun feto iha prosesu dezenvolvimentu.
Iha mos atividades ne’ebe SEPI hala’o iha Suku Mehara mak hanesan, promosaun produtu local aprezenta husi Madre sira, SEPI mos sei entrega Official Grupu Trabalhu Jeneru Distrital ba todus membrus iha distritus tomak, jogus amizade entre SEPI ho komunidade Mehara, loke filmazen SEPI nia papel halo promosaun feto iha TL, inklui halo dialogu ho komundade Mehara.
Entretantu Xefe Suku Soba, Sub-distritu Laga, Distritu Baucau, Francisca Monica de Fatima Soares hateten loron ida ne’e importante tebes ba feto iha area rural sira, tanba ne’e tenke selebra duni iha area rural atu feto sira iha area rural mos involve iha atividade hirak ne’e.
“Hau hanoin kona ba loron feto rural ida diak maibe tenke selebra iha area rural atu feto iha area rural ne’e involve hotu iha laran, labele selebra deit iha nasional no distrital bele mos to’o iha area ne’ebe rural liu tanba loron ne’e ba feto sira area rural la’os feto nasional,” Xefe Suku ne’e katak.
