Atu garante fo atendementu ne’ebe diak husi Pesoal Saude ba pasiente sira inklui prevene sasan labele lakon iha sala laran, Ministeriu Saude (MS) sei monta kamera CCTV iha Sala importante tolu inklui Sala Maternidade iha Ospital Nasional Guido Valadares (HNGV).
“Sei monta iha Sala Partus, Sala Parteira sira nian no Sala VIP no Emergensia, ho objetivu atu Pesoal Saúde sira bele halo monitorizasaun ba moras sira ho diak liu tan, tanba rekursu ne’ebe sei minimu liu-liu kalan pesoal sira bele fo atendimentu ba pasiente ida, nia mos bele hare ho seluk liu husi CCTV ne’ebe iha,” dehan Ministru Saúde, Sergio Lobo, iha Parlamentu Nasional.
Ministru Lobo dehan, Orsamentu ba planu hodi estabelese CCTV ne’e iha ona no sei realize iha tempu badak.
Entretantu Reprezentante Povu iha Uma Fukun Parlamentu, Deputada Josefa Alvares Soares ladun konkorda ho planu MS ne’e tanba servisu nudar Pesoal Saude hanesan vokasaun ida.
“Tuir lolos ne’e la presiza atu tau kamera sira ne’e, tanba ema ida-idak hatene tuir sira nia obrigasaun atu halo, se tau karik iha pesoal saúde sira nia klaran ne’e buat ruma la’o la los tanba ne’e presiza tau kamera hodi observa lala’ok sira nian,” Deputada Soares tenik.
Enkuantu tuir fontes konfirmadu ne’ebe lakohi fo sai nia identidade iha HNGV katak, monta CCTV iha HNGV la’os foin primeira ves,maibe durante ne’e iha ona iha Sala Emergensia no VIP. “So ke la funsiona deit,” tenik fontes konfirmadu ne’e.
