“Sira ba Japaun atu estuda kona ba Ofisial Polisia Suku, e programa ne’e foin maka dezenu no hetan ona aprovasaun husi Komando Jeral, ne’e maka agora dadaun ita hahu uluk fase kapasitasaun, haruka sira ba hare tuir iha rai seluk nian ne’e la’o oinsa,” dehan Komandante Departementu PK, Superintendente Boavida Ribeiro, iha Kaikoli, Dili.
Tuir nia, membru PK nain lima ne’e kompostu husi Komandante Polisia Komunitaria Distritu Viqueque, Xefe Polisia Komunitaria Distritu Lautem, Xefe Polisia Komunitaria Distritu Bobonaro, Membru Polisia Komunitaria Nasional, no Adjuntu Xefe Polisia Komunitaria Nasional.
Formasaun hanesan ne’e dalabarak sira tuir e husi nasaun Japaun sempre fo oportunidade ba sira durante ba semana rua, semana ida iha Japaun no semana ida iha Bekasi-Jakarata (Indonezia), no semana ida tan iha Jogya hodi aprende kona ba oinsa involve komunidade sira iha area seguransa nian.
“Wainhira sira fila mai sira bele fahe informasaun ne’e ba Polisia Komunitaria ne’ebe maka ita koloka ona iha suku sira ne’e, atu nune’e sira mos bele iha konesementu,” Komandante Departementu PK ne’e katak.
Iha parte seluk Prezidente Komisaun B Parlamentar, Deputada Maria Lurdes Martins Bessa hateten, ne’e diak nune’e bele kapsita liu tan sira nia servisu iha komunidade ho diak liu tan.
“Ne’e importante teb-tebes, dezenvolve Polisia Komunitaria presiza iha estudu barak hanesan oinsa bele iha atendementu lalais ba problema ida,” dehan Prezidente Komisaun B ne’e.
