Konstrusaun ba edifisiu Unidade Bataliaun Orden Publiku (BOP) ne’ebe hahu halo kontrusaun iha tinan rua ba kotuk sei remata iha tinan ne’e.
“Tinan ida ne’e sei remata, durante ne’e kompania iha atrazu oituan, iha sistema teknikus balun hau husu AND ba hare ona no ami nia ekipa mos ba hare hotu ona,” dehan Sekretariu Estadu Seguransa (SES), Francisco Guterres, foin lalais iha Dili.
Tuir nia, kompania mos rekonese katak konstrusaun ba edifisiu ne’e atraza duni tanba ne’e sira sei esforsu an finaliza iha tinan ne’e.
Entretantu II Komandante Polisia Nasional Timor-Leste (PNTL), Komisariu Afonso de Jesus desde BOP sai husi Fatuhada, to’o agora sira laiha edifisiu permanente ida.
“E ita hatene katak agora dadaun kontrusaun ba edifisiu BOP la’o hela iha Bairo-Pite, maibe hau la hatene tanba saida maka seidauk kompleta,” preokupa Komisariu de Jesus.
Tuir nia, ida ne’e empedementu bo’ot ida ba servisu BOP nian, tanba ne’e husu ba kompania ne’ebe kaer projeitu ne’e atu finaliza lalais kontrusaun ne’e.
Nia afirma, durante ne’e sira hela iha Uma Kontainer husi Kompania Wear nian hamutuk ho Guarda Nasional Republikana (GNR) sira. “Maibe agora sira sai tiha ona fatin ne’e husi Sekretariiu Estadu Defeza mak uza fali.”
