Oras ne’e dadaun husi formulariu 2.300 resin ne’ebe hasai husi Komisaun Promosaun Estra Ordinariu (KPEO) ba Membru Polisia Nasional Timor-Leste (PNTL), foin ema (Polisia) nain 2.116 mak hatama ona sira nia dokumentus atu konkore.
“Formulariu ne’ebe maka ami fahe ne’e hamutuk 2.300 i tal, maibe Polisia Nasional Timor-Leste ne’ebe maka priense ona ne’e, ami simu fali hamutuk 2.116,” dehan Prezidente Komisaun Promosaun Extra Ordinariu, Isabel Ferreira, iha Hotel Timor, Dili.
Tuir nia, iha mos membrus balun lakohi atu konkore ba iha Promosaun Extra Ordinariu ne’e.
” Hau la hatene tanba sa, e ita hatene katak promosaun la’os obrigatoriu, ne’e direitu ida kada membru polisia nian kuandu hakarak tuir sira bele tuir, kuandu lakohi labele obriga,” dehan Prezidente KPEO ne’e.
Kona ba Membru PNTL ne’ebe involve krimi maibe konkore iha promosaun ne’e, nia dehan komisaun seidauk hatene tanba ne’e la’os kompetensia komisaun nian.
“Ami simu formulariu hotu depois alista tiha naran sira, no ami sei haruka ba instituisaun kompetente sira hanesan Ministeriu Publiku, Tribunal no Polisia Servisu Kriminal, sira maka fo informasaun ba ami katak membru sira ne’e balun iha inflasaun disiplinar ou kriminal pendenti, ne’e duni agora ami seidauk hatene,” dehan Prezidente KPEO ne’e.
Entretantu Deputadu Mateus de Jesus fo apoia masimu ba membru PNTL sira ne’ebe konkore ona ba promosaun ne’e e sira merese duni.
“Tanba sira hatene sira nian an katak sira priense duni rekizitu sira ne’e, sira bele tuir, ne’e buat ne’ebe maka normal no diak,” dehan Deputadu de Jesus.
Tuir nia, karik durante ne’e balun hatudu duni sira nia servisu ne’ebe maka signifikativu, e komisaun presiza fo atensaun ba sira.
