“Tesi kotu, labele multa-multa tan,” hateten Sekretariu Estadu Januario Pereira, iha Parlamentu Nasional.
Tuir nia, fo sansaun ba ema halo ligasaun eletrisidade ilegal desde tempu UNTAET nian kedas e foin adauk husi EDTL halo tan ligasaun ba uma 40 mil.
“Ami mos halo ona sosializasaun liu husi media radio no televizaun katak ahi ne’e interese nasional nian e ita hotu tenke fo kontribuisaun ba nasaun, labele halo ligasaun ilegal,” hateten SE Pereira.
Iha fatin hanesan Prezidenti Komisaun E ne’ebe trata asuntu Infra-estrutura, Deputadu Pedro da Costa Martires katak, Komisaun halo ona audensia publika ho SEE, oinsa mak bele kria regulamentu ida nune’e bele uza eletrisidade ho diak.
“Ita mos tenke kontribui oituan, tanba eletrisidade lakan uza mina, tanba ne’e hau konkorda kuandu governu fo sansaun ba konsumidores ilegal,” Deputadu ne’e apoia.
Tanba ne’e nia parte apoia atu governu halo sosializasaun ba iha populasaun sira antes hasai sira nia ahi bainhira sira halo ligasaun ho ilegalmente “atu nune’e sira bele hatene katak ligasaun ilegais ne’e bele prejudika ita nia moris, dezastre bele ahi han uma ou bele ita mate,” dehan Deputadu ne’e.
