Iha 03 Outubru 2012 Tribunál Distritál Suai (TDS) kondena Arguidu ne’ebé komite krime tentativa Abuzu Seksuál (AS) ba menór ba tinan 10 iha prizaun. Vítima ba kazu ida ne’e foin mak ho idade tinan 11. Kazu ne’e rejista ho Númeru Prosesu: 135/PEN/2012/TDS.
“JSMP kongratula no apresia desizaun ne’e tanba manisfesta komitmentu estadu nian liu husi tribunál no ajente prosesual sira atu proteje labarik sira husi kualkér forma violénsia,” dehan Diretór Ezekutivu Programa Monitorizasaun ba Sistema Judisial (JSMP), Luis de Oliveira Sampaio, foin lalais, iha Dili.
Tribunál kondena Arguidu bázeia ba akuzasaun Ministériu Públiku nian, ne’ebé mak refere ba artigu 24 kona-ba tentativa nia punibilidade konjuga ho artigu 177.2 Kódigu Penál Timor-Leste kona-ba abuzu seksuál ba menór. Krime ne’e ho pena abstratu entre tinan 5 too tinan 15 prizaun.
Mesmu nune’e, Tribunál fó oportunidade ba parte sira atu rekere ba Tribunál Rekursu durante tempu loron 15 hodi halo rekursu hasoru desizaun ne’e, kuandu parte sira la satisfas ho desizaun tribunál primeíru instánsia.
Audiénsia julgamentu ho kompozisaun kolektivu, maibé iha leitura akórdaun dirije husi Juíz singulár Dr. Costãnçio Barros Basmery, Minitériu Públiku repzenta husi Dr. Oscar Silva Tavares no parte Defeza Dr. João Henrique de Carvalho husi Eskritóriu Defensória Públiku.
Entretantu Deputadu Mateus de Jesus hateten, ne’e Tribunal nia kompotensia duni atu fo pena ba Arguidu ida ne’ebe komete krime.
“Tanba hatur tiha ona iha lei kodigu penal ninian katak se maka iha tentativa ou yang rencana untuk membuat sesuatu ba ema ne’ebe maka minoridade, ne’e nia tenke hetan pena ne’e mais de 10 anos, ne’ebe maka tribunal halo ne’e bazea duni ba salah no aktu ne’ebe maka arguidu halo ba” dehan Deputadu de Jesus.
Nia espera katak, wainhira Arguidu sai husi prizaun, labele halo tan hahalok hanesan ne’e tanba ne’e ladun diak ba nia moris rasik no ba familia uma laran.
