Selebrasaun loron Internasional Feto Rural ba tinan ne’e ho tema ‘Hakbi’it Feto Rural Liu Husi Edukasaun’ tanba edukasaun importante ba ema hotu hodi hadia ema nia vida moris, liu-liu atu promove feto rural sira ho diak liu tan tenke liu husi edukasaun.
“Ohin ita nia tema mak edukasaun tanba nia mak nudar pilar importante, dezenvolvimentu la iha folin no valor ba ema ida se wainhira moris iha ignoransia nia laran no ita hotu tenke hanoin katak valor kultural, universal mak proteje ema nia moris,” dehan Prezidente Grupu Feto Parlamentar (GMPTL), Deputada Josefa Alvares Soares, iha selebrasaun loron Internasional Feto Rural, iha Salaun João Paulo II, Comoro, Dili (09/10).
Tuir nia, lolos ba selebrasaun loron internasional Feto Rural tinan ne’e tau tema ‘Mantein O Nia Espasu iha Mitigasaun No Adaptasaun Ba Mudansa Klimatika’ maibe espesial ba Timor-Leste GMPTL tau tema iha leten ne’e tanba xave atu promove igualidade jeneru mak edukasaun.
Nia hatutan, feto Timor barak mak sei moris iha vulnerabilidade kiak iha prosesu dezenvolvimentu, tanba ne’e governu liu husi Ministeriu Edukasaun kria politika ne’ebe diak hodi promove edukasaun ba ema hotu liu-liu feto maluk sira tanba liu husi edukasaun mak bele halo mudansa barak iha feto nia moris.
Alende ne’e obstaklu seluk ne’ebe empede feto rural (foinsa’e) sira difisil asesu ba edukasaun durante ne’e mak tanba eskola do’ok husi sira nia hela fatin, falta saneamentu entaun feto labele uza sintina, falta finanseira tanba sira ema barak, falta nutrisaun no seluk tan.
Entretantu Ministru Edukasaun (ME), Bendito Freitas promete katak sei rehabilita eskola sira hotu iha teritorio tomak, hadia infra-estrutura bazika iha eskola, politika kurikulum no kontinuasaun ba programa ensino rekorente iha nivel nasional to’o iha area rural.
Tuir Ministru, hakbi’it feto rural liu husi edukasaun importante tebes investimentu publiku capital finanseiru husi Orsamentu Jeral do Estadu (OJE) tenke investe maka’as iha setor edukasaun hanesan nasaun seluk sira disponibiliza ate sinku biloens de dolares.
“Tanba ne’e hau hanoin investimentu publiku tenke fo vantagen bo’ot ba edukasaun maibe konsiente mos katak ita nia orsamentu jeral do estadu iha nivel ida to’o iha ne’e ita mos iha ministerio barak dezenvolve planu de asaun tanba ne’e ministeriu edukasaun la’os la’o mesak maibe ita buka atu reforsa hadia sistema prestasaun servisu, jestaun, rehabilitasaun, infra-estrutura bazika ba eskola sira hotu hahu husi ministeriu to’o distrital no regional atu bele atende dezenvolvimentu setor edukativu no fo atensaun makas liu ba maluk feto sira,” dehan Ministru Freitas.
