Atu animal sira labele tama no estraga makina sira Sentral Eletrika Hera (SEH), oras ne’e dadaun Governu halo tiha ona moru protesaun ba sentral ne’e.
“So iha fali sorin iha tanki sira ne’e mak sei tau redi odamatan ninian, restu ne’e moru horu,” informa Prezidenti Komisaun E, Deputadu Pedro da Costa, hafoin fiskalizasaun iha fatin ne’eba,semana kotuk.
Tanba ne’e nia parte garante katak Sentral Eletrika Hera agora iha kondisaun ne’ebe seguru tanba iha ona moru protesaun “Bee sira ne’ebe mak husi foho mai tama ne’e sira halo tiha ona baleta, sira kondus hotu ba tasi,” dehan tan Deputadu ne’e.
Iha fatin hanesan Sekretariu Estadu Eletrisidade (SEE), Januario Pereira hateten, Governu kumpri ona hodi halo protesaun ba SEH ne’e.
“Moru ba rezidensia ne’e mak halo to’o tiha ona mai iha kraik, falta oituan atu tutan ba sorin, ne’e segundu, e moru primeiru mak ba Sentral Eletrika ne’e,” tenik SE Pereira.
Nia garante katak ho moru protesaun ne’ebe governu halo tiha ona ne’e, makina sira iha sentral eletrika ne’e sei la hetan problema, liu-liu atu animal ka ema labele tama arbiru hodi estraga.
