“Mate ruin sira ne’e uluk Militar Indonezia 745 mak kaptura iha tinan 1982 lori mai oho iha kuak laran maibe ami mos la hatene sira ne’e se se,” hateten Komunidade Fatulia, Joaquin Sarmento Pereira foin lalais iha Fatulia, Baucau.
Komunidade ne’e konta, mate ruin sira ne’e malae nain tolu (mane nain rua no feto ida) mak deskobre uluk mate ruin ne’e maibe Timor oan ne’ebe mak sente nia familia lakon iha momentu ne’eba to’o agora seidauk iha ema ruma mai vizita kuak ne’e.
“Maibe mate ruin sira ne’e ami diskunfia Timor oan hotu deit husi 13 distritu nian oan deit mak oho iha kuak laran ne’e,” dehan Komunidade ne’e.
Nia dehan, kuak ne’ebe mate ruin sira iha ba ne’e besik uma lisan Kaibosi nia sorin kedas ho distansia la’o metru 10 deit to’o ona iha fatin ne’e.
Komunidade ne’e husu mos ba Timor oan sira iha 13 Distritus ne’ebe mak sente familia lakon iha 1982 nian, bele ba hare iha kuak refere.
Entretantu Badaen (halo hela uma lisan Kaibosi) Jose Olo-Loi, katak mate ruin sira ne’e la’os Venilale oan nian deit maibe timor oan husi 13 distritus.
“Ami ba hare mate ruin ne’e tais iha oin barak, tanba tais iha kuak ne’eba husi Distritu Suai nian,Oe-cusse, Lospalos,Baquia nian no mos distritu sira seluk nian iha hotu,” dehan Badaen Olo-Loi.
“Fatuk kuak ne’e naruk ami tun ba hare mak mate ruin sira ne’e naklekar deit iha kuak laran ne’eba,” nia dehan tan.
