Atu evita inundasaun bainhira tempu udan, Ministeriu Obras Publiko (MOP) liu husi Diresaun Estrada hamoos bee dalan (kanu kuak) ne’ebe ki’ik no intupidu ho foer, nune’e bee bele halai ho diak.
“Agora ami halo hela manutensaun iha Becora STM to’o iha eis SMA 1 nian, no iha Dili laran tomak komesa halo hela kebersihan hotu hanesan iha Perumnas no seluk tan,” dehan Engineering Estrada MOP, Jose Agustus iha Mandarin, Dili.
Tuir nia, agora dadaun iha parte Villa Verde no Colmera nian sei halo kostruksaun foun ba bee dalan, nune’e bainhira tempu udan bele la’o tuir nia dalan no la hamosu inundasaun.
“Ne’e duni ami bele garante katak bele minimize ona inundasaun iha fatin balun,” dehan Engineering Estrada ne’e.
Nia mos apela ba komunidade sira atu labele soe foer tan ba bee dalan ne’ebe sira halo ona manutensaun.
Entretantu Deputadu Eladio Faculto husu ba Governu atu aselera lalais programa manutensaun kanu kuak sira ne’e, tanba udan besik mai ona.
“Se la’e bele estraga fali estrada ne’ebe maka foin halo sira ne’e no kuandu bee sa’e mak komunidade sira sei desaraska tanba ne’e presiza iha programa ne’ebe maka integradu atu bele hare ba kestaun ne’e, tenke hamoos kanu sira ne’e,” dehan Deputadu Faculto.
Tuir Deputadu ne’e katak, realmente baleta sira ne’e balun fo’er maka taka metin, no balun baleta maka laiha kualidade, inklui baletabalun estragadu tanba ne’e bee sempre sa’e bainhira udan.
