Ministeriu Obras Publiko (MOP) liu husi Diresaun Estrada servisu hamutuk ho Kompania Estrada Boot (KEB) desde fulan rua ba kotuk to’o agora hala’o atividade taka estrada ne’ebe kuak iha kapital Dili.
“Agora dadaun ami komesa tambal ona dalan sira ne’ebe kuak ki’ik oan sira ne’ebe iha Dili laran ne’e hanesan iha area Critu Rei nian, iha Embaixada Indonezia nia oin no balun iha Colmera, ami uza alkatraun ne’ebe maka mai husi Afrika nian ne’ebe iha kualidade duni,” dehan Engineering Estrada MOP, Jose Agusto iha Mandarin, Dili.
Tuir nia, maske nune’e to’o agora KEB seidauk hato’o relatoriu ba MOP kona ba total estrada ne’ebe maka sira hadia ona. “karik tanba sira sei halo hela rehabilitasaun maibe depois de hotu sira bele informa mai ami,” Engineering Estrada ne’e tenik.
Iha lidun seluk Deputadu Mateus de Jesus hateten, ne’e atividade ne’ebe maka diak nune’e kareta no motor bele la’o ho seguru.
“Wainhira governu ho emprazariu bo’ot sira maka taka ona dalan sira ne’ebe maka kuak-kuak sira ne’e , hau senti ne’e diak,” dehan Deputadu de Jesus.
Maibe tuir nia, labele tuir fali esperiensia ne’ebe maka ladun diak iha tempu pasadu hadia estrada laiha kualidade la to’o fulan at tiha fali.
“Ida ne’e maka hau hakarak para sira toma atensaun, maibe hau agradese duni ho inisiativa ne’e,” Deputadu ne’e agradese.
