“Wainhira ita nia ema tama ho illegal, entaun sira tenke prosesu tuir sira nia lei, depois ita mos halo aprosimasaun entre sira teknikamente hodi koalia, hodi ita nia ema ne’e entrega mai ita fali,” dehan Komisaria PNTL Afonso de Jesus, iha nia knar fatin, foin lalais ne’e.
Tuir nia, problema hanesan ne’e normal no akontese bebeik ona,e laiha problema seriu ida. “Tanba kuandu sira nia ema mai ita nia rain ho ilegal, ita prosesu tuir ita nia lei, depois entrega ba Departamentu Imigrasaun hodi deporta fali ba sira nia rain, ne’e duni durante tinan 10 ona laiha problema kona ba ida ne’e,” esplika Komisariu de Jesus.
Entretantu Deputada Virginia Anna Belo hateten, kada Nasaun iha sira nia lei ne’ebe maka diferente, ne’e duni wainhira iha sidadaun ida tama ema nia nasaun ho ilegalmente, ema sei prosesa nia tuir lei ne’ebe sira iha.
“Depois maka ita konfirma ho TNI sira, para oinsa ita nia ema ne’e bele husik fila mai ita nia rain, ita so koko kria aprosimasaun deit ho sira iha Indonezia,” dehan Deputada Belo.
Deputada ne’e mos apela ba populasaun sira hotu, liu-liu iha fronteira atu labele tama iha ema nia rain sein iha dokumentus kompletu, tanba se la’e bele kria problema ne’ebe maka ladun diak entre nasaun rua ne’e.
