“Ne’ebe sira nia salariu sei mantein nafatin 50 dolar kada fulan no sei la sa’e ba 115 dolar tanba Kozineira sira ne’e kontratadu la’os Funsionariu Publiku,” hateten Diretor Mota, iha Vilaverde, Dili.
Kona ba pagamentu ba sira nia salariu sempre tarde tanba tuir nia, prosesu mak nune’e duni, sira to’o fulan rua-rua ka tolu-tolu mak foin selu sira.
“Sira ne’e moris ho subsidiu deit, subsidiu ne’e relasiona ho programa ne’e, se programa ne’e kontinua,sira mos kontinua,se programa ne’e to’o loron Governu muda tiha oin seluk fali sira la servisu ona,” Diretor Mota informa.
“Preokupasaun ne’e hau hato’o ona iha momentu halo reuniaun ho Komisaun F Parlamentar, maibe iha momentu reuniaun ne’e rezeita labele hasa’e sira nia salariu to’o 115 dolar tanba sira la’os Funsionariu Publiku,” Diretor Mota katak.
Entretantu Deputadu Manuel Guterres lamenta ho salariu ne’ebe Kozineiras sira ne’e simu e to’o ona tempu atu governu valoriza ema nia servisu.
“Kada fulan sira simu deit 50 dolar deit, ida ne’e labele, tenke hadia,” Deputadu ne’e kestiona.
Tuir Deputadu ne’e katak, ohin loron sasan hotu-hotu nia folin sa’e maka’as iha lozas ka merkaduria, tanba ne’e governu tenke hare no tetu didiak molok fo servisu ba ema ida.
