Programa IV Governu ne’ebe hari uma lima kada Aldeia ba ema vulneravel iha Distritu 13 nia laran maibe iha Distritu Aileu la kompleta ho bee moos no halo benefisiariu sira desaraska.
“Uma hira ona mak sira hela ona I uma hira mak iha ona saneamentu e kanalizasaun tanba hau ba Aileu hau hare ida iha foho leten ne’e, maran hela deit,”kestiona Deputada Josefa Alvares Soares, foin lalais iha Parlamentu Nasional.
Tanba ne’e nia sujere ba Governu foun tenke iha planu ne’ebe diak, nune’e uma sira ne’e kuandu halo tiha bele fo duni benefisiu ba benefisiariu sira.
Iha fatin hanesan Deputadu Cesar Valente de Jesus husu komisaun kompetente atu halo fiskalizasaun ba fatin sira ne’ebe governu hari uma lima ne’e.
“Hau nia prinsipiu mak ida ne’e kualker hora sidadaun sira loke tornera bee tenke sai,” dehan Deputadu ne’e.
Tanba tuir nia, iha V Governu filosofia mak kontinua programa ne’ebe mak husi IV Governu implementa ona inklui mos hari uma lima iha kada aldeia ne’e.
Entretantu hatan ba preokupasaun ne’e, Sekretariu Estadu Agua Saneamentu e Urbainzasaun (SEASU), Elias Pereira Moniz katak, Deputadu sira labele kritika deit maibe tenke hatene fatin klaru atu nune’e bele esplika.
“Uma iha lai mak kanaliza ga iha Aileu uma iha ne’ebe,” SE Moniz dehan.
