Husi total Orsamentu Jeral Estadu (OJE) ano fiskal 2012 $1.377 milioens ne’ebe aloka ba iha Sekretaria Estadu Promosaun Igualidade (SEPI), hahu Janeiru to’o agora konsege ona ezekuta pursentu 62 e sira la propoin ba Orsamentu Ratifikativu (OR).
“Osan husi governu ami hetan deit $1,377 milioens no mos ami simu tan osan husi doadores sira ba implementasaun orsamentu sensivel ba jeneru 100 pursentu, ami ezekuta hotu agora ami kontinua ezekuta orsamentu husi UNFPA to’o Dezembru, husi governu ami ezekuta 62 pursentus e ami fiar katak fulan Dezembru ami ezekuta to’o 100 pursentus,” dehan Sekretaria Estadu Idelta Maria Rodrigues, iha Parlamentu Nasional.
Nia informa, orsamentu 62 pursentus ne’e SEPI ezekuta ba planu hanesan kategoria Bens de Servisu, Salariu Vensimentu, Kapital Menor, Dezenvolvimentu Kapital Umanu no Transferensia Publika.
Entretantu Prezidente Komisaun F Parlamentar, Deputadu Virgilio da Costa Hornai hateten , ezekusaun OJE iha SEPI la’o ho diak, e sira nia pos tender sei nafatin la’o hela ho osan 2012 nian.
“Hau hanoin laiha problema ho sira nia ezekusaun orsamentu tanba SEPI la hetan Orsamentu Ratifikativu, sira mantein nafatin ho orsamentu annual 2012 nian,” dehan Deputadu Hornai.
Deputadu ne’e dehan, SEPI la propoin ba OR tanba laiha nesesidade exstra, katak Orsamentu Ratifikativu ne’e despeja ida atu reajusta nesesidade ruma.
Deputadu ne’e sujere ba SEPI, atu labele halo deit atividade sensibilizasaun promosaun ba partisipasaun feto iha kapasitasaun abilidade, maibe tenke halo mos atividade real ne’ebe fo kondisoens moris no hadia ekonomia moris ba feto sira liu –liu iha area rurais.
