Falta transposte no Edifisiu ne’ebe klo’ot sai obstaklu bo’ot ba Funsionariu sira iha Sekretaria Estadu Promosaun Igualidade (SEPI) atu implementa planu asaun annual ho diak tanba to’o agora SEPI seidauk iha edifisiu permanente ida.
“Hau hanoin dificuldade ida mak relasiona ho veiklu operasional servisu SEPI nian ba iha distritu sira, ida seluk mak ami mos iha dificuldade ba edifisio ne’ebe ami preve atu iha mos planu edifisio foun ba SEPI, ami nia planu iha 2013 maibe seidauk dehan atu halo konstrusaun, ami hahu halo prosesa ona hanesan dezenu, espera katak iha mandatu ida ne’e SEPI bele iha edifisiu rasik,” preokupa Sekretaria Estadu Idelta Maria Rodrigues, iha Parlamentu Nasional.
Sekretaria Estadu afirma, asuntus balun ne’ebe SEPI presiza hadia hanesan mekanismu hodi suporta diak liu tan grupu jeneru sira ne’ebe hetan Transferensia Publika husi SEPI, liu –liu iha area monitorizasaun no avaliasaun ba orsamentu ne’ebe grupu sira simu.
Iha parte seluk Reprezentante Feto iha Uma Fukun Parlamentu Nasional, Deputada Bendita Moniz Magno hateten atu implementa planu no programa ne’ebe diak presiza rekursu umanu ne’ebe sufsiente no fasilidade ne’ebe kompletu inklui mos edifisiu.
Tanba tuir nia, Timor-Leste tama ona membru CEDAW, e importante tebes atu iha edifisiu ne’ebe adekuadu.
“Ami husu para SEPI halo nia programa no planu mai iha Parlamentu, ami komisaun F bele ajuda hodi bele hetan aprovasaun iha Parlamentu atu bele halo konstrusaun ida ba SEPI, tanba ita hare SEPI se nia hatama ema barak mos labele bo’ok an maske programa barak,” dehan Deputada Moniz.
