Tuir Prezidente Komisaun B Parlamentar ne’ebe mak trata asuntu Negosiu Estranjeiru, Defeza no Seguransa Nasionais, Deputada Maria Lurdes Bessa katak, Komisaun halo ona reuniaun ho SED kona ba kestaun ne’e, maibe komisaun presiza justifikasaun ne’e klaru, tanba osan barak mak fakar ba portu ne’e maibe laiha rezultadu diak.
“Ami hanoin justifikasaun husi Governu seidauk kompletu no seidauk los, ne’e duni ami sei bolu tan ADN mai iha ne’e, para atu bele klarifika lolos prosesu kontratu ida ne’e no konstrusaun no pagamentu, tanba osan barak mak gasta ona ba obra ne’e, seidauk uza tohar tiha e agora governu husu fali osan um pontu um miliaun atu selu kompania Lifes ne’ebe kaer projeitu ne’e,” preokupa Prezidente Komisaun B PN, Deputada Maria Lurdes Bessa, (26/09), iha PN.
Deputada ne’e dehan, lolos portu ne’e entrega ona ba iha Instituisaun F-FDTL tanba konstrusaun remata ona, maibe tanba laiha kualidade entaun ikus mai tohar no tenke hasai tan osan ba obra ne’e.
“Agora dadaun ADN sei negosia ho kompania ne’e atu sira hadia fali maka ita selu fali,” dehan Deputada ne’e.
Entretantu Diretor Ezekutivu Fundasaun Mahein (FM), Nelson Belo hateten, Kompania Lifes tenke fo esplikasaun ne’ebe detaila ba publiku, tanba saida mak fakar osan barak maibe obra laiha kualidade no ikus mai tenke tohar fali.
“Tanba sa maka kompania ne’e halo la iha kualidade maibe kontinua halo pagamentu, ida ne’e presiza iha esplikasaun, wainhira kestaun hanesan ne’e maka bebeik akontese, povu lakon konfiansa ba governu,” dehan Diretor FM ne’e.
Kona ba SED propoin tan $1.1 miliaun husi OR hodi finaliza portu ne’e, tuir nia laiha problema, importante tenke iha klarifikasaun ne’ebe lolos ba publiku.
Iha deklarasaun fo sai hosi John Dowd, Chairman Directores Lifese Pty Ltd, nia nega nia organizasaun halo buat ruma sala no dun responsabilidade ba Komandante Komponente Naval Timor oan nian.
“Lifese Pty Ltd hetan prevensaun hosi Komandante Komponent Naval atu harii ponte-kais iha fatin tuir dezenhu ne’ebe halo ona ne’ebe besik fatin ne’ebe ikus fali harii duni ponte-kais,” hateten
deklarasaun ne’e. “Wainhira ami hetan ordem atu harii ponte-kais iha fatin agora nian ami fo hatene kedas ba Komandante Komponente Naval katak presiza ke rai tasi tan, tanba ponte-kais besik liu rai maran sei hetan sobu durante tasi-tun lor-loron.”
Lifese Chairman Dowd hateten mos katak tanba konfuzaun kona ba informasaun kona ba Primiru Ministro Xanana Gusmao nia instrusaun mos aumenta ba kondisaun aat ponte-kais Hera nian.
“Tanba iha konflitu informasaun entre Komandante Komponente Naval no Sekretáriu Estadu Sr. Júlio Pinto, ami husu Primeiru Ministru atu rezolve situasaun ne’e. Primeiru Ministru ba to’o Portu Hera hodi hare’e fatin konstrusaun ponte ne’e nian no Komandante Adjuntu mak simu nia tanba Komandante ba tiha tasi balu. Komandante Adjuntu hatudu ba Primeiru Minsitru fatin ne’ebé Komandante hili atu harii ponte ne’e. Primeiru Ministru hatán maibé fó orientasaun atu haree detalles hotu-hotu. Maibé sira latuir orientasaun hotu-hotu Primeiru Ministru nian,” hateten tan Chairman Dowd.
