Komisaun Anti Korupasaun (KAK) asina akordu servisu ho parte Polisia Nasional Timor-Leste (PNTL), ho objetivu atu koopera hamutuk hodi hala’o atividade kombate korupsaun iha rai laran.
“Ami asina ona akordu ho PNTL hodi bele koopera hamutuk, ne’ebe maka ami bele detein ami detein no ne’ebe maka ami presiza polisia nia tulun ami husu, tanba lei ne’e fo knar tomak ba KAK atu kaer ga atu halo operasaun,” dehan Prezidente KAK, Komisariu Aderito da Costa, iha Sentru Konvensaun Dili.
Komisariu ne’e dehan, kombate korupsaun la’os buat ne’ebe fasil, tanba ne’e KAK sei halo treinamentu konjunta ho Polisia hodi hasa’e konesementu no kapasidade kona ba oinsa mak bele kombate korupsaun.
“Iha tempu besik mai sei iha treinamentu,haklean liu tan kona ba saida maka ita presiza halo atu bele kombate korupsaun ne’e,” dehan Komisariu da Costa.
Alende ne’e sei hadia mos sistema ne’ebe la diak, e kada fulan tur hamutuk ho Diretor relevante sira hodi halo diskusaun kona ba asaun prevene korupsaun “la’o ga la’e, presiza dezenvolve ida ne’e, no programa ne’e bolu Asaun Prevensaun Korupsaun,” Komisariu KAK ne’e.
Entretantu II Komandante Jeral PNTL, Komisariu Afonso de Jesus hateten, Polisia prontu atu fo apoiu no koopera hamutuk ho KAK hodi kombate korupsaun.
“Ho akordu sira ne’e hotu PNTL prontu atu bele kopera hamutuk ho CAC, hodi kombate korupsaun iha rai laran,” dehan Komisariu de Jesus.
