Ho kazu naok sasan ne’ebe ohin loron buras iha rai laran, liu-liu iha capital Dili, Komando Jeral Polisia Nasional Timor-Leste (PNTL) husu ba komunidade sira atu kolabora ho parte seguransa nian hodi pasa informasaun, nune’e bele detekta naokten sira ne’e.
“Konserteza informasaun ita la’o hela no efetivu tebes husi Polisia Komunitaria no Polisia Patruliamentu, e ami mos husu ba komunidade sira atu labele pasifivu liu, se komunidade sira hatene hato’o kedas keixa ba polisia,” sujere II Komandante PNTL, Komisariu Afonso de Jesus, (26/09), iha Kaikoli, Dili.
Kona ba Komunidade sira ne’ebe maka sira nia sasan ema na’ok, karik laiha oportunidade atu mai hato’o keixa iha PNTL ,bele ba iha Lider Komunitaria sira.
“Maibe wainhira hato’o keixa iha polisia, importante mak tenke koalia klaru, nune’e polisia bele foti medidas,” Komisariu ne’e sujere.
Tuir Komisariu de Jesus, atu detekta naok ten sira ne’e presiza kolaborasaun diak entre Polisia ho komunidade sira. “fo informasaun ba malu, hodi bele resolve problema ho lalais, wainhira ita laiha linha kordesaun ne’ebe maka diak, entaun ita halo buat ida mos sei la la’o ho susesu,”.
Husi sasan ne’ebe na’ok ten sira na’ok maioria motor, hanesan akontese iha bairo Lahane Osidental, iha Igreja Motael, iha merkadu Halilaran no fatin seluk tan ne’ebe durante ne’e risku ba na’ok ten sira atu na’ok sasan komunidade sira nian.
Entretantu Deputadu Eladio Faculto hateten, kazu naok ten buras iha rai laran, tanba falta de kampu de servisu no ema barak mak seisauk hetan servisu.
“Polisia bele halo atuasaun ba kondisaun hirak hanesan ne’e, maibe ita tenke hatene tanba saida maka ema bele sai na’ok ten, ita tenke buka uluk motivu ne’e lai, mais pronto ne’e hahalok ne’ebe la diak no polisia tenke kaer sira,” dehan Deputadu Faculto.
Deputadu ne’e sujere, karik Polisia kaer toman na’ok ten sira, labele ho violent, presiza trata sira ho diak, tanba sira la’os tur-tur atu sai na’ok ten maibe situasaun uma laran mak obriga sira.
