Ministeriu Obras Publiku (MOP) ho Orsamentu Jeral Estadu ba ano fiscal 2013,sei hari edifisiu foun ida ba Sekretariu Estadu Obras Publiku (SEOP), nune’e bele efetivu liu tan servisu iha fatin rua ne’ebe durante ne’e hamutuk hela.
“Ne’e importante tanba ami nia servisu aumenta, ami presiza ema atu servisu ho diak, konserteza presiza fatin ne’ebe diak mos, tanba ne’e ami tenta ho orsamentu 2013 nian,” hateten Ministru Gastao de Sousa, iha Parlamentu Nasional.
Ministru ne’e dehan, tuir planu ne’ebe maka iha edifisiu ne’e sei hari iha area Kaikoli, no hafoin ne’e sei halo rekrutamentu ba funsiunariu foun, tanba iha programa balun sei falta ema atu hala’o.
Entretantu Deputadu Mateus de Jesus hateten, ida ne’e hanesan nesesidade ida ne’ebe presiza atu toma atensaun.
“Atu funsiona administrsaun ne’ebe maka diak presiza mos fatin ne’ebe sufsiente atu nune’e funsiunariu sira bele hala’o sira nia knar ho efisiensia,” dehan Deputadu de Jesus.
Kona ba atu halo rekrutamentu ba funsiunariu, nia dehan depende, kuandu sira aprezenta planu ne’e iha Parlamentu, mak sei hare no estuda lai antes aprova orsamentu.
