Atu estrada iha area Fatuahi nian labele monu bebeik bainhira tempu udan, Sekretariu Estadu Obras Publika (SEOP), sei halo estudu analiza ida nune’e iha futuru labele monu tan.
“Ami mai husi Kuatru Governu konstitusional ami mantein nafatin ne’ebe mak diak no ami sei hadia ne’ebe mak sei aat inklui estrada Fatuahi ne’ebe monu bebeik bainhira udan, ami sei halo estudus ida kona ba ida ne’e,” hateten SEOP, Luis Vaz Rodrigues, iha Parlamentu Nasional.
Tuir nia, maske agora dadaun rehabilitasaun la’o hela, maibe la signifika katak ne’e diak ona, tanba ne’e presiza iha estudu analiza ida kona ba estrada ida ne’e.
Entretantu Prezidenti Komisaun E Parlamentar, Deputadu Pedro dos Martires da Costa dehan, estrada Fatuahi agora dadaun iha ona estudu viabilidade nia laran.
“Nia konstrusaun iha faze rua, primeira faze sira tenke halo uluk ponte ida iha parte Norte nian, tenke diak para kareta sira bele liu, segunda parte mak foin halo moru protesaun ba iha rai monu ne’e,” esplika Deputadu ne’e.
Prezidente Komisaun E ne’e afirma, konstrusauna ba primeira parte ba estrada ne’e ne’ebe kaer husi Kompania JICA nian agora atinji ona pursentu 50 (50%) e obra ne’e tama iha Planu Estratejiku Dezenvolvementu Nasional (PEDN).
