Kongregasaun Madre Alma oferese Sentru Fisioterapia ba labarik sira ne’ebe ho kondisaun defisiente, nune’e sira bele halo terapia ho rutina no prevene sira nia kondisaun atu labele aat liu.
“Fisioterapia ita fo ba labarik sira ne’ebe selebral parsi (problema ho kakutak) ne’ebe fo impaktu ba labarik nia orgaun seluk hanesan liman ida ka ain ida la funsiona ho diak, entaun ita tenke ajuda sira ho fisioterapia atu prevene labele aat liu, la’os atu kura,” dehan Madre Anastasia Muti Alma, iha Pantai Kelapa, Dili.
Tuir Me.Alma, labarik kuaze 500 resin mak tuir fisioterapi rutina iha sentru ne’e, husi numeru ne’e labarik balun hela duni iha Orfonato Madre Alma ne’e, enkuantu sira ne’ebe hela iha liur ka iha Distritu, madre sira sei ba tula sira inklui mos tama sai uma hodi halo terapia ba sira.
Madre ne’e informa, labarik balun nia kondisaun komesa diak ona maske la’os diak total maibe sira bele kaer sasan ruma ho diak.
Madre Alma dehan, sira servisu hamutuk ho no hetan apoiu husi Governu liu husi Ministeriu Solidaridade Sosial (MSS), hodi sosa fasilidade terapia nian.
Iha parte seluk Ministra Solidaridade Sosial (MSS), Isabel Amaral Guterres promete, sira sei kontinua fo suporta ba programa ne’e liu husi proposta ne’ebe sira hatama maibe depende ba orsamentu ne’ebe iha.
“Ami sei hatutan deit programa IV governu nian ne’ebe konserteza tau matan ba defisiente sira ne’e kontinua la’o, pur ezemplu hanesan bolsa da mae, veteranus, idozus, defisiente, no seluk tan,” dehan Ministra Guterres, (26/09), iha Parlamentu Nasional.
