“Iha planu estratejiku, ita mos tau parte irigasaun nian, hodi bele hare to’ok karik balun seidauk hetan susesu, karik balun presiza rehabilita ita rehabilita tiha, hanesan Vatu Karau Ulun ne’ebe maka agora dadaun atu tau osan hodi hadia fali,” dehan Ministru Agrikultura e Peskas, Mariano Asanami Sabino, iha Parlamentu Nasional.
Alende irigasaun MAP mos sei halo barajen ba mota ninin sira nune’e bele evita inundasaun bainhira tempu udan.
“Ami identifika ona pontu 15 ne’ebe maka target ida atu sai barajen, e agora dadaun mai koko atu dezenvolve to’ok buat ne’e,” dehan Ministru Asanami.
Entretantu Deputadu Aurelio Freitas Ribeiro hateten, ne’eplanu ne’ebe mak diak maibe tenke iha implementasaun, tanba dalabarak aprova tiha orsamentu planu balun la la’o.
“E dalabarak mos buat sira ne’e halo la ho kualidade, halo tiha tinan rua ka tolu aat fali, ne’e maka sai preokupasaun bo’ot, planu bele planu no aprova osan dadauk, maibe tenke implementa no uza ho diak, no tenke ho kualidade, ne’e maka importante” Deputadu Ribeiro sujere.
