“Ami husu ba Deputadu sira iha terseira lejislatura ninian,atu debate no aprova lalais lei reparasaun ba vitima krime pasadu ninian no mos memori institute publiku,” rekomenda Diretor Ezekutivu JSMP,Luis de Oliveira Sampaio, (20/09), hafoin hasoru malu ho Komisaun A iha PN.
Tuir Diretor JSMP, katak Lei Reparasaun das Vitimas ne’e la konsege aprova iha mandatu II Lejislatura nian tanba Deputadu sira la preenxe korum hela deit.
Entretantu Deputadu Mateus de Jesus dehan, lei ne’e seidauk bele diskuti iha tempu badak tanba Parlamentu sei okupa ho Orsamentu Ratifikativu nian durante fulan ida nia laran.
“Depois hotu tiha sambung kedas ho Orsamentu Jeral do Estadu ba ano fiskal 2013 ninian, karik iha 2013 mak foin bele debate ba lei sira ne’ebe sei pendent hela durante ne’e,” dehan Deputadu ne’e.
Iha fatin hanesan Deputadu Estanislao da Silva katak, lei ne’e kaduka tiha ona, tanba ne’e tenke reajenda fali no tenke asina husi Deputadus sira.
“Labele aprova tanba kaduka tiha, tenke hatama fali, baixa fali ba komisaun depois lori fali mai iha Parlamentu para debate,” Deputadu da Silva dehan.
“Maibe iha definisoens no konseptu balun ne’ebe ke tenke klarifika didiakiha lei ne’e para labele kria konfuzasaun kona ba interpretasaun definisaun de vitimas ne’e,” Deputadu ne’e tenik.
