Oras ne’e dadaun ekipamentus Medikus sira nian iha Sala Operasaun Ospital Nasional Guido Valadares (HNGV) balun la funsiona ona tanba impaktu husi bee moos ne’ebe parte Ospital uza durante ne’e ba makina sira ne’e laiha kualidade.
“Realmente makina rezerva Osmosis, makina Computed Technology Scan no seluk tan avaria, hare husi teknika makina ne’e aat tanba bee moos ita nian ne’e nakonu ho kalkariu, entaun laiha filtru hodi ta’es bee ne’e maibe direitamente ba makina ne’e entau fo impaktu bo’ot ba makina operasaun,” levanta Deputadu Eladio Faculto, hafoin hala’o vizita ba Sala Emergensia ba HNGV foin lalais, iha Parlamentu Nasional.
Ho situasaun ida ne’e empede prosesu atendementu ba pasiente sira ne’ebe presiza hasai resis no halo oeprasaun ba sira nia moras, enkuantu kada loron pasiente 60 resin ho moras hanesan kurasaun, tumor no seluk tan mak tama iha sala ne’e.
Enkuantu total makina iha sala operasaun HNGV iha makina unidade tolu, bo’ot iha rua noki’ik ida, maibe iha fulan kotuk makina bo’ot rua ne’e hetan avaria, ida seluk hadia diak falin no ida seluk aat to’o agora.
Entretantu Xefe Departementu Administrasaun Finanças, Logistika HNGV, Santana Martins hateten bee moos sai kestaun importante tebes ba povu hotu,e espera katak ho prezensa industria bee moos ne’ebe estabelese husi Governu Korea liu husi KOICA iha Metinaro bele mos fo apoiu ba HNGV.
“Situasaun ne’ebe ospital hasoru dadauk ne’e hanesan bee moos nakonu ho kalkariu, fo impaktu ba ekipamentus medikus hanesan auto clap no seluk tan avaria hotu tanba bee moos laiha kualidade, espera katak governu Korea bele ajuda hodi resolve problema ne’e nune’e labele dificulta ekipamentus sira ne’e,” Xefe Martins esperansa.
