“Labele fa’an arbiru ita bo’ot sira nia rain, sei la’e aban bainrua ita sai fali penonton iha ita nia rain rasik, ne’e duni hotu-hotu tenke hanoin ida ne’e,” bandu Ministru Justisa, Deonizio Babo, foin lalais durante vizita ba Ermera.
Tanba ne’e tuir Ministru komunidade sira tenke proteze rain ne’ebe sira iha “tanba rai ne’e ita nia avon sira rai hela mai ita, no ita tenke iha hanoin katak rai ne’e nudar ita nia isin sorin balun,” dehan Ministru Babo.
Ministru ne’e dehan, kuandu iha komunidade balun iha rai barak, nia bele fahe ba oan sira no familia sira, maibe labele fa’an ba ema husi rai seluk, tanba “ita nia rai ne’e mos lulik no ita hatene,”.
Entretantu Diretor Nasional Terras Propridade (DNTP) Jaime Xavier Lopes katak agora dadaun DNTP kria hela programa ida atu oinsa bele prevene komunidade sira labele fa’an rai arbiru.
“Ida ne’e tama ona iha programa kintu Governu ninian, bandu komunidade atu labele fa’an sira nia rain arbiru, ami sei fo konesementu ne’ebe maka klean ba komunidade kona ba desvantajen wainhira sira hakarak fa’an sira nia rain ba ema seluk,” dehan Diretor DNTP ne’e.
Nia hato’o kestaun ne’e relasiona ho iha komunidade balun iha Distritu balun komesa fa’an sira nia rai ba esma estranjeiru sira, liu-liu sira ne’ebe hala’o negosiu iha Timor.
