“Politika ida ne’e la’o tiha ona iha 2004 maibe iha krize 2006 mak hapara buat ne’e, mais iha 2015 komunidade komesa selu ona,” hateten Diretor Nasional Servisu Agua e Saneamentu (DNSAS), Joao Jeronimo, foin lalais iha Kaikoli, Dili.
Nia dehan, iha 2004 komunidade sira husi Distritu Viqueque mak selu uluk tarifa bee nian to’o agora bee la’o estabil hela.
“Agora komu ema la hetan bee moos, ita labele obriga ema selu, hadia tiha sistema diak hotu-hotu hetan tiha ona ita avansa ho tarifa para mantein,” dehan Diretor Jeral ne’e.
Alende ne’e Deputadu Antonio dos Santos katak, ida ne’e diak nune’e komunidade bele fo nia kontribuisaun ba nasaun maibe governu mos tenke hadia bee ne’ebe to’o agora balun seidauk hetan asesu.
“Ita nia komunidade balun tenta ba buka bee kuaze to’o kilometrus neen maibe kondisaun ida ne’e ita seidauk prepara sa ‘tan ita atu dada tan oinsa,” Deputadu ne’e katak.
Kona ba bee moos iha fatin balun suli estraga, tuir nia tanba governu laiha planu ne’ebe mak diak hodi fornese bee ba komunidade sira.
“Iha distritu deit bee loron ida deit mai komunidade kuru la to’o litru lima, bee maran tiha ona, ida ne’e oinsa ita selu,” Deputadu ne’e kestiona.
