Grupu Feto Parlamentar (GMPTL) konsidera implementasaun Orsamentu Jeral do Estadu (OJE) durante tinan lima ba kotuk seidauk sensivel ba jeneru tanba seidauk bele responde nesesidade feto no labarik sira iha rai laran.
“Orsamentu ne’e seidauk bele kontempla iha saida mak ita bolu dehan sensivel ba jeneru, tanba se ita dehan sensivel ba jeneru signifika katak bele fasilita ba parte rua hotu (feto no mane), realidade labarik no feto barak mak nafatin sai vitima,” kritika Prezidente GMPTL, Deputada Josefa Alvares Soares, foin lalais iha Parlamentu Nasional.
Tuir nia, orsamentu sensivel ba jeneru la’os atu fahe direitamentu ba feto 50 pursentu no 50 pursentu ba mane, maibe atu hare nesesidade bazika feto, labarik no mane sira atu bele iha integrasaun iha sira nia planu no programas inklui hare impaktu no benefisiu husi implementasaun orsamentu ne’e.
Deputada ne’e mos rekonese katak iha tinan lima ba kotuk iha buat balun mak komesa halo maibe barak mak seidauk fasilita didiak implementasaun sensivel ba jeneru.
“Tanba estradas rurais kontinua at, klinika sei halerik nafatin ba aimoruk no pesoal saúde limitadu, falta ambulansia, falta infra-strutura bazikas iha eskolas no seluk tan, entaun difisil atu dehan orsamentu jeral do estado sensivel ba jeneru,” Deputada ne’e tenik.
Entretantu Sekretariu Estadu Promosaun Igualidade (SEPI), Idelta Maria Rodrigues hateten, hahu aloka orsamentu sensivel ba jeneru iha 2008, maibe implementa lolos iha 2010 ne’ebe hetan apoiu husi UN Women.
“Hau hanoin koalia kona ba orsamentu sensivel ba jeneru ita hahu ida mak kona ba implementasaun Lei Violensia Domestika ne’ebe ita pasa osan atu fo atensaun, maibe seidauk to’o tanba ne’e agora ita atu habelar no hadia liu tan saida mak ita halo ona,” dehan SE Rodrigues.
Nia afirma, agora dadaun SEPI iha faze preparasaun atu halo analiza ba todus ministeriu no fo formasaun introdusaun ba Diretores Jeral, Diretores Orsamentu kada ministerial no secretarial sira hotu hodi hare implementasaun orsamentu sensivel ba jeneru iha tinan lima mai ne’e.
