Programa V Governu Konstitusional durante tinan lima nian ne’ebe aprezenta iha Parlamentu Nasional foin lalais, Primeiru Ministru promote sei hadia no hasa’e produsaun agrikola iha rai laran.
“Ami sei kontinua hadia pratikas agrikolas atu bele aumenta produsaun foos no batar no promove kresimentu koiletas importantes hanesan kaf , vanila, kami ho mina nuu,” hatete Primeiru Ministru, Kay Rala Xanana Gusmao, iha aprezenta Programa V Governu nian ba iha Parlamentu Nasional.
Maibe tuir nia, programa hirak ne’e bele implementa kuandu iha irigasaun no abastesimentu bee ne’ebe diak ne’ebe sei liu husi konstrusaun barajen.
“Ami sei promove mos kualifikasaun ida ke diak liu ba agrikultores liu husi fo asistensia teknika no aumenta numeru ajentes estensaun agrikola no mos hari tan Sentrus Servisu Agrikula iha distritus,” PM Gusmao katak.
Entretantu Deputadu Antonio dos Santos alias 55 katak, ne’e planu programa maibe tekniku hira mak Governu prepara ona hodi hasa’e produsaun agrikola iha rai laran.
“Hau hanoin susar oituan tanba sira ladun esplika mai ami klaru ,atu koalia kona ba presu kafe tenke hare ba kualidade,”dehan Deputadu ne’e.
Tanba tuir nia durante ne’e kafe no vanilla iha distritu Ermera estraga deit e governu nunka ba sosa, so emprezariu NCBA, Timor Global ho Timor COB mak hola iha ne’eba.
“Governu koalia kona ba redus kiak mais to’o agora sira seidauk kria kondisaun diak,” Deputadu ne’e kritika.
