Governu liu husi Sekretariu Estadu Komunikasaun Sosial (SEKS), sei kria Ajensia Notisia Timor nian e agora dadauk halo hela nota intendimentu ho lian Portugues, oinsa atu halo levantamentu ida hodi kria ajensia ne’e.
“Se ita koalia kona ba kantor berita ne’e, se-se mak atu asesu kantor berita ne’e, iha merkadu para ema atu langganan ga la’e,” hateten Sekretariu Estadu Nelio Izaac, iha Parlamentu Nasional.
Razaun Timor presiza kria Ajensia Notisia ida tanba Timor tama dadauk ona sai membru organizasaun bo’ot rua CPLP no la kleur tan sai membru ASEAN.
“Nasaun sira ne’e mos presiza no hakarak hatene kona ba informasaun Timor nian,” SE Izaac tenik.
Alende ne’e kria Ajensia ne’e hanesan meius marketing estadu nian atu loke Timor-Leste ba iha mundu no mundu bele koneseno hatene kona ba Timor.
Entretantu Deputadu Virgilio da Costa Hornai katak,media nia kobertura la’os iha nasional deit maibe tenke loke luan tan ba iha internasional, atu nune’e komunidade internasional bele asesu kona ba informasaun Timor ninian.
“Hau hanoin Kintu Governu Konstitusional mai ho nia programa ida ne’e ita tenki ser apoia programa ne’e tanba hanoin ida ne’e oinsa bele meloramentu ba servisu media nian,”
Deputadu ne’e dehan, agora dadaun kanal televizaun nian seidauk to’o iha baze atu komunidade asesu informasaun.
“Hau hanoin ho Orsamentu kada annual nian to’o Cinco anos to’o 2017 ita bele responde problemas balun ne’ebe mak iha,” Deputadu ne’e tenik.
