“To’o agora laiha alat ruma atu detekta buat hanesan ne’e, jangankan alat, treinamentu espesifiku kona ba ida ne’e mos laiha, pur ezemplu oinsa maka ita bele identifika, no narkoba ne’e oinsa, iha mos seluk hanesan krimi organizadu oinsa ho krimi Trans Nasional ne’e oinsa, ami la hatene no laiha treinamentu espesifiku kona ba ida ne’e, no ami presiza tebes treinamentu sira hanesan ne’e,” sujere Komandante UPF, Superintendente Xefe Agusto Gomes, iha Kaikoli, Dili.
Tuir nia, knar UPF iha fronteira importante tebes hodi kontrola ema no sasan ne’ebe maka tama sai iha linha fronteira, liu husi patrullamentu no halo vizilansia.
Maske nune’e tuir Komandante ne’e to’o agora parte UPF seidauk kaer ema ruma ne’ebe lori narkoba ou sasan deskonfia ruma.
Maibe presiza tau atensaun ba kestaun ne’e, liu-liu oinsa mak bele tau orsamentu espesfisiku e nudar nasaun ida presiza tebes atu halo antisipada tanba asuntu ne’e sensivel liu.
Entretantu Sekretariu Estadu Seguransa (SES), Francisco Guterres hateten , ne’e la’os knar UPF atu detekta problema hanesan ne’e.
“Ita iha ekipa ida ne’ebe maka halo servisu kona ba ida ne’e (droga), no iha UPF sira mos ita fo kbi’it no treinamentu, no hau hanoin katak ita fo fiar deit ba sira atu bele fo swguransa masimu ba ida ne’e, ita la fo treinamantu nebe maka espesifiku ba UPF kona ba atu buka tuir droga sira ne’e, tanba sira nia knar ne’e prevene ema atu tama sai ho ilegalidades, inklui droga karik ema balun lori, no sira bele hato’o ba komandante investigasaun, la’os ba buka tuir buat ne’e, ne’e duni ita la fo treinamentu ne’ebe maka espesifiku ba ida ne’e,” dehan SE Guterres.
Maibe atu hametin seguransa iha area fronteira agora dadaun ne’e presiza kria kondisaun ne’ebe maka diak ba sira, no orsamentu ne’ebe maka sufsiente, “ne’e maka politika no buat ne’ebe maka importante,” dehan SE Guterres.
