Programa prioridade Governu liu husi Sekretariu Estadu Komunikasaun Sosial (SEKS) durante tinan lima nia laran sei fo bolsu estudu ba Jornalista sira, hodi hasa’e tan sira nia kapasidade no sai profesional liu tan iha sira nia profisaun.
“Ida ita fo konsentrasi fo bolsu estudu ba kada Jornalista sira para sira hasa’e tan sira nia kapasidade entermus iha rai laran ou bele mos sira ba iha rai liur,” hateten Sekretariu Estadu Nelio Izaac, foin lalais iha Parlamentu Nasional.
Entretantu Primeiru Ministru, Kay Rala Xanana Gusmao bainhira aprezenta programa V Governu nian durante tinan lima mai iha Parlamentu hateten, Governu sei promove meius Komunikasaun Sosial nian.
“Governu sei promove meius Komunikasaun Sosial nia diversidade ho independensia no sei garante asesu ba informasaun , ba liberdade espresaun no ba liberdade imprensa,” dehan PM Gusmao.
Tuir nia, aspetu sira ne’e krusiais tebes ba konsolidasaun demokrasia no atu kumpri objetivu servisu hodi hari nasaun ida ne’ebe dezonvolvidu, prosperu no sivilizadu.
Entretantu Diretor Diariu Timor Post,Otelio Ote hateten, governu labele halo promesas barak liu maibe tenke iha implementasaun.
“Tenke tau iha pratika, la’os koalia deit,” dehan Diretor Timor Post ne’e.
Diretor diariu Timor Post ne’e mos husu ba governu tenke independente no labele halo diskriminasaun entre media sira. “Labele fo deit media ne’ebe besik governu, e sira ne’ebe do’ok la hetan oportunidade,” Diretor Timor Post ne’e fo hanoin.
