Membru Parlamentu Nasional husi Bankada Fretilin lamenta ho aprezentasaun Programa V Governu Konstitusional ne’ebe la inklui programa urbanizasaun durante tinan lima oin mai ne’e.
“Sekarik planu urbanizasaun ne’e la halo, halo uluk fali ba iha planu roda viariu sei sai defisil tebes-tebes ba ita bo’ot,” lamenta Deputada Josefa Alvares Soares husi Bankada Fretilin, foin lalais iha Parlamentu Nasional.
Tuir nia, urbanizasaun ne’e komponente ida importante tebes atu trasa roda viariu jeral ninian.“Ida ne’e ita bo’ot la halo ita sei hakilar malu, ita sei ta’a tan malu, sei sobu ema ida ne’e nia uma, sei sobu ema ida ne’e nia dalan sei ulun fatuk moras,” Deputada ne’e tenik.
Entretantu Primeiru Ministru (PM), Kay Rala Xanana Gusmao katak, planu urbanizasaun sei la tau ba programa ne’e, tanba urbanizasaun la’os halo deit iha Dili maibe mos iha Distritus no Sub-distritu sira.
“Ida ne’e sei lori tempu oan ida atu halo levantamentu terenu, levantamentu hotu-hotu ne’ebe ita bele komesa planeamentu urbanu ida,” dehan PM Gusmao.
PM Gusmao afirma, urbanizasaun sei implementa deit ba fatin neb’ee mak luan atu nune’e bele enkoraja ema, se la’e halai hotu mai iha Dili.
“Ho desentralizasaun ne’ebe buka atu halo ne’e buka atu reve ita nia maluk sira balun, liu-liu setor privadu sira no komponente sira seluk atu bo’ok oituan husi Dili ne’ebe mak nakonu demais ona ba fali sentru urbanus sira ne’ebe mak mais organizadu ho saneamentu ne’ebe mak diak,” Xefe Governu ne’e katak
