Ministru Edukasaun (ME) halo diskusaun ho Reitores husi Universidade Publiku no Privada hodi koalia kona ba dezafius ne’ebe durante ne’e sira infrenta.
“Objetivu enkontru ne’e mak halo diskusaun ida hamutuk ho Reitor sira husi Prezidenti Fundasaun husi instituisaun sira ne’e atu oinsa hare hamutuk identifika problema no dezafiu saida-saida deit mak Ensino Superior infrenta, atu nune’e bele formula hamutuk ideas ba futuru,” hateten Diretor Jeral Ensino Superior, Abrao dos Santos, fulan kotuk iha Hotel Timor, Dili.
Enkuantu total Reitor ne’ebe partisipa iha diskusaun ne’e hamutuk nain 14, husi universidade sira hanesan Universidade Nasional Timor Lorosa’e (UNTL), Universidade Dili (UNDIL), Dili Institute of Teknology (DIT), Universidade Oriental Timor Lorosa’e (UNITAL), Institute Of Bussiness (IOB), Institutu Ciensia Saude (ICS), Universidade da Paz (UNPAZ), inklui Akademia Polisia Nasional Timor-Leste no seluk tan.
“Universidade ne’ebe mak akreditadu tiha ona mak hanesan, UNTL, UNPAZ, DIT, IOB , Institutu Formasaun Profesores (IFP), Universidade Cannossa, Universidade Café Ermera,” Diretor ne’e informa.
Entretantu Vise Reitor UNITAL, Mateus Soares, ne’ebe partisipa iha diskusaun ne’e dehan diskusaun ne’e importante tebes ba universidade hotu-hotu tanba bele fo hanoin hamutuk para hadia Ensino Superior iha Timor-Leste.
“Mesmu ke ami seidauk akredita maibe agora dadauk ami prepara hela dokumentus sira ne’ebe mak husi edukasaun nian ami sei prepara sasan sira ne’e,”
Nia espera katak iha tinan 2013 UNITAL bele hetan akreditasaun ona tanba agora dadaun sira priense ona kriteriu husi Ministeriu Edukasaun nian.
