“Atu estabelese baze lojistiku ida ba setor petroliferu iha Suai ne’ebe portu foun sei sai hanesan motor importante tebes ida ba dezenvolvementu no atu halo konsepsaun ba programa rejional kona ba konstrusaun portus, programa ne’ebe sei hatudu atu halo konstrusaun ka reparasaun ka alargamentu ba instalasoens entre Laga ho Lautem, instalasaun iha Atauro, Kairabela, Oe-Cusse ho Manatutu,” hateten Primeiru Ministru, Kay Rala Xanana Gusmao, hafoin aprezenta programa kintu do Governu ne’e nian ba iha Parlamentu.
Entretantu Deputadu Aurelio Freitas husi Bankada Fretilin pesimista ho programa sira ne’e atu implementa hotu durante tinan lima mai ne’e.
“Lolos loke estrada ba to’o iha Lospalos ne’e mos sufsiente ona maibe hakarak hari tan portu iha Manatutu, Kairabela, Laga no Lospalos,” Deputadu Freitas duvida.
“Ita hakarak hari tan porto barak-barak iha Baucau, iha Lospalos no Viqueque, ita bele uza ka la’e, keta hanesan ita hari merkadu iha fatin-fatin maibe la uza, ita hari fatin fa’an ikan iha Lesidere ne’eba,” Deputadu ne’e dezafia.
Tanba ne’e Deputadu ne’e sujere, diak liu hare ba asuntu ne’ebe prioridade ba povu nia moris, duke hari portu barak-barak e ikus mai la uza no gasta osan saugati deit.
