Eskola Ensino Baziku iha Turiskai ne’ebe Governu halo iha 2009 ho Projeitu Emerjensia la kompleta ho fasilidade eskola nian hanesan meja no karteira, obriga estudante sira tenke hakdasak aan iha rai hodi tuir prosesu aprendizajen.
“La’os deit meja kadeira mak laiha maibe eskola ne’e mos besik monu ona tanba kondisaun eskola dodok hotu ona, se ita bo’ot sira la fiar, ba to’ok iha Turiskai ne’eba,” dehan Deputadu Leonel Marcal, iha Parlamentu Nasional.
Tuir nia, eskola hirak ne’ebe halo ho projeitu emerjensia, nia rezultadu ladiak hotu, tanba sira halo ho ai no didin ho hadak.
Tanba ne’e nia sujere ba Ministeriu Edukasaun atu halo politika ne’ebe mak diak nune’e hari eskola foun tan karik iha duni kualidade no fo benefisiu ba komunidade sira.
Entretantu Primeiru Ministru, Kay Rala Xanana Gusmao sente triste ho kondisaun eskola ne’ebe dalabarak liu la diak no la favoravel ba alunus sira atu tuir prosesu aprendizajen.
“La’os ita bo’ot deit mak sente laran moras, ami rasik e hau mos moe tanba hau mos liu husi fatin ne’eba fila fali mai sira halo embuskada ba hau, hau ba hare hau moe,” dehan PM Gusmao.
Xefe Governu ne’e espera katak ho mandatu Governu ida ne’e, liu-liu ministeriu no sekretariu estadu ida-idak sei servisu maka’as liu tan, hodi labele akontese problema hanesan ne’e.
“Ita hotu sukat ita nia kbi’it, ita nia hahalok iha efisiensia, buat sira ne’e hotu,” PM Gusmao tenik.
Enkuantu hatan ba kestaun ne’e, Ministru Edukasaun (ME), Bendito Freitas katak, ministeriu sei servisu maka’as hodi responde ba situasaun sira ne’e.
“Ami komprimitidu tebes atu servisu maka’as para fo respostas ba situasaun ida ne’e,” Ministru Freitas promete.
