Polisia Distritu Aileu hahu halo operasoens ba farda polisia nian ne’ebe durante ne’e espalha nokomunidade sira uza no konsege rekolha fardas hamutuk 1000 resin (1000 -an lembar).
Tuir Komandante Polisia Distritu Aileu, Superintendente Ludgerio P.M.Lay katak, operasaun hala’o bazea ba lei numeru 30, despois de Komando Jeral PNTL anunsia iha Jornal Republika, no operasaun fahe ba etapa tolu.
“Etapa primeiru ne’e total 700 resin, segundu total 520 no ida ikus ne’e hamutuk 160 resin,” informa Komandante Lay, foin lalais iha Kuartel Jeral PNTL, Kaikoli, Dili.
Tuir nia, fardas hirak ne’ebe sira rekolha mak hanesan alende PNTL nian, mos farda Forsa Seguransa Internasional (IFS), Militar Indonezia nian inklui mos husi tempu Japaun nian,hanesan sapeo,sapatu no farda, e fardas hirak ne’e sei sunu hotu.
Iha parte seluk Deputadu Aurelio Freitas Ribeiro hateten, PNTL halo operasaun hodi rekolha fardas tuir lei ne’ebe iha.
“Uluk halo ona lei no ida ne’e implementasaun husi lei ne’e, ita sente orgulhu tanba sira bele aplika lei ne’e ho diak no bele rekolha farda sira ne’e ho montante ne’ebe maka barak,” Deputadu Ribeiro orgulhu.
Deputadu ne’e apresia tanba iha kolaborasaun diak entre Polisia ho komunidade hodi reklha fardas hirak ne’e ho diak no susesu.
