“Tanba bengkel ne’e liga liu ba oli foer e hau sei rona sira atu bele iha planu ida kona ba jestaun oli foer inklui mos populasaun sira iha Dili laran,” dehan SE Nomiando “Buras” Martins, (10/09), bainhira hala’o enkontru ho Funsionariu SEMA, iha Centru Convesaun Dili (CCD).
SE dehan, tarjetu SEMA nian mak populasaun tenke moris iha ambiente ne’ebe harmonia no diak, enkoraja ba entidade hotu iha Timor laran atu fo liman ba malu hodi bele garantia ambiente ne’ebe moos iha rai doben ida ne’e.
Nia informa, lei atu fo protesaun ba ambiental ne’e iha ona maibe seidauk implementa tanba entidade hotu ladauk iha konsiensia rasik atu garantia ambiental ne’ebe diak tanba ne’e sosializasaun importante tebes antes implementa lei ne’e.
Entretantu,Pontu Focal Distritu Ermera, Edelmiro Jose de Deus katak programa sensibilizasaun ba populasaun importante tebes tanba liu husi informasaun bele muda ema nia hanoin no mentalidade kona ba impaktu husi estraga ambiente.
“Buat hotu-hotu konsentra iha nasional, ami so implementa deit maibe obstaklu bo’ot ba ami mak orsamentu bainhira ita koalia kona ba ambiente ne’ebe sustentavel tenke iha orsamentu, tanba ne’e ba futuru tenke iha orsamentu ida ketak atu hala’o programa sensibilizasaun ba baze,” Pontu Fokal ne’e sujere.
Nia hatutan, durante tinan 10 nia laran ekipa SEMA iha Distritu Ermera hala’o programa sosializasaun ba populasaun sira iha distritu Ermera kona ba ambiental ne’ebe sustentabilidade.
Pontu Fokal ne’e espera katak ho enkontru ida ne’e sira sei hetan orsamentu nune’e bele hala’o progama sensibilizasaun ba baze, liu-liu iha Distritu Ermera.
