“Sira atu hatutan nafatin ita nia setor edukasaun iha Timor-Leste, ita hatene katak ita nia governu liu husi orsamentu jeral do estadu labele kobre nesesidades hotu, planu iha maibe kada planu asaun annual ita mos iha kontra partida ho parseirus dezenvolvimentu e ohin realize lansamentu projeitu importante tolu ne’e sai sinal atu reflete kontinuasaun koperasaun ho doadores sira,” dehan Ministru Edukasaun, Bendito Freitas, (07/09), iha Vila verde, Dili.
Ministru dehan, sei fo treinamentu ba profesores sira espesifiku liu ba material sira ne’ebe kada mestre sira lori ka uza hanorin iha eskola sira hanesan Matematika, Biologia, Estudu du Meiu no material seluk tan.
“Ho objeitvu atu promove edukasaun ne’ebe ho kualidade no infraestrutura, fo fatin ba alunus sira hodi hala’o aprendizajen ho diak inklui mos koalia kona ba haforsa jestaun ne’ebe kabeer ba funsiunario Ministeriu Edukasaun nian atu bele servisu ho diak liu tan ba future, atu servi alunus tanba ne’e sira sei sai hotu benefisiario ba projeitu ne’e,” dehan Ministru ne’e.
Enkuantu eskola ne’ebe sei tama iha kategoria prioridade hodi halo rehabilitasaun mak hanesan eskola 05 de Maiu, 28 de Novembru no eskola sira seluk iha distritus no sub-distritus, sira sei hetan oportunidade ho orsamentu husi parseirus ne’e.
Iha lidun seluk Manajer-Em-Servisu Banku Mundial Timor-Leste, Hans Anand Beck hateten Timor-Leste atinji ona progresu importante balun iha setor edukasaun maibe sei iha dezafiu barak atu mantein kualidade edukasaun ne’ebe aas.
Tuir nia, iha estudantes barak mak sei re-aprova bainhira hahu eskola no sei iha problema iha prosesu aprendizajen tanba problema infraestrutura, kualidade professores no jestaun institusional ministeriu nian ne’ebe la’o ladun diak e nudar parseiru dezenvolvimentu promote, nafatin fo apoiu ba setor edukasaun atu hadia kualidade edukasaun no promove edukasaun ne’ebe kualidade iha rai laran.
“Banku Mundial sei komete hodi alinea ami nia suporta ba setor edukasaun hodi bele hadia tan kualidade aprendizajen iha nasaun tomak inklui mos Timor-Leste tanba ami rekonese katak investimentu iha setor edukasaun importante teb-tebes ba futuru jerasaun foun no ba dezenvolvimentu nasional liu-liu nasaun ne’ebe maioria populasaun joven hanesan Tior-Leste,” dehan BM MES Beck.
Nia dehan, projeitu tolu hanesan formasaun ba profesores sira, haforsa setor Edukasaun Non Formal (literasia ba adultu sira), haforsa kapasidade institusional atu implementa planu estrategiku ministeriu nian ne’e sei implementa husi Ministerio Edukasaun ho durasaun tinan 3-5 nia laran.
